Debati me rastin e Ditës së të Zhdukurve: Hapja e arkivave dhe nisja e procedimeve ndaj përgjegjësve

“’Çështja e të zhdukurve është gjithmonë edhe çështja e krimeve të kryera gjatë luftës, dhe kur ballafaqoheni me to, ai është momenti kur merrni përsipër edhe përgjegjësinë dhe kur fillon ndjekja penale e atyre të cilët kanë kryer krimet e luftës. Pushtetet nuk duan të merren me çështjen e të zhdukurve pikërisht për shkak të mungesës së vullnetit për t’i thirrur në përgjegjësi autorët e këtyre veprave”, tha Serbeze Haxhiaj, gazetarja e Rrjetit Ballkanik të Gazetarisë Hulumtuese (BIRN) në Kosovë, gjatë një debati të Nismës së të Rinjve për të Drejtat e Njeriut në prag të Ditës Ndërkombëtare të të Zhdukurve më 30 gusht.